જસદણ તાલુકાના આટકોટ ગામ પાસે રાજકોટ-ભાવનગર હાઈવે પર સર્જાયેલા એક માર્ગ અકસ્માતમાં ગંભીર રીતે ઘવાયેલા વૃદ્ધનું લાંબી સારવાર બાદ કરુણ મોત નિપજ્યું છે. આ બનાવને પગલે મૃતકના પરિવારમાં ભારે શોકનું મોજું ફરી વળ્યું છે.

પ્રાપ્ત વિગત મુજબ, આટકોટ ગામના વતની જેઠાભાઈ મનજીભાઈ ખોખરીયા (ઉંમર વર્ષ 65) પોતાનું બાઈક લઈને આટકોટ તરફ આવી રહ્યા હતા. આ દરમિયાન રાજકોટ-ભાવનગર હાઈવે પર આવેલી હોટલ તાજ નજીકના પેટ્રોલ પંપ પાસે તેમનું બાઈક અચાનક સ્લીપ થઈ ગયું હતું. બાઈક પરથી પટકાતા જેઠાભાઈને માથાના ભાગે ગંભીર ઈજાઓ પહોંચી હતી. અકસ્માત બાદ ઈજાગ્રસ્ત વૃદ્ધને તાત્કાલિક લોહીલુહાણ હાલતમાં નજીકની હોસ્પિટલમાં સારવાર અર્થે ખસેડવામાં આવ્યા હતા. છેલ્લા આશરે દોઢ મહિનાથી તેઓ હોસ્પિટલના બિછાને જીવન અને મરણ વચ્ચે જંગ લડી રહ્યા હતા. જોકે, તમામ પ્રયત્નો છતાં તેમની તબિયતમાં સુધારો ન થતા આખરે સારવાર દરમિયાન તેમનું મૃત્યુ નિપજ્યું છે.

આ બનાવની જાણ થતા જ આટકોટ પોલીસ કાફલો ઘટનાસ્થળે અને હોસ્પિટલ પહોંચ્યો હતો. પોલીસે અકસ્માત અંગે ગુનો નોંધી આગળની કાયદેસરની કાર્યવાહી હાથ ધરી છે. વૃદ્ધના નિધનથી સ્થાનિક પંથકમાં અને ખોખરીયા પરિવારમાં ગમગીની છવાઈ ગઈ છે